Pages

Thursday 29 November 2012

囡囡生日~熊貓生日蛋糕

11月第三個生日到啦!

囡囡倒數咗成個星期, 佢嘅生日大日子, 佢終於等到啦!

囡囡今年想要熊貓生日蛋糕!

無論小咪咪幾忙都要完成尼個任務!

登~登~登~登~ 熊貓蛋糕出場啦!



囡囡order隻熊貓要朱古力味, 小咪咪當然要依order做啦, 仲加咗士多啤利係中間添!

啱啱好, 係囡囡放學前整好!

佢放學返嚟見到個蛋糕好開心呀!

Monday 26 November 2012

老公奄列


忙足一個星期, 終於到週末, 昨日老公話晚餐等佢煮!

好呀! 唔洗做, 老公煮咩呢? 佢話煮奄列喎, 一於等食囉!

晚餐之前, 仲有成個下午!

下午老公和朋友去酒吧睇欖球, 對運動一D都無與趣嘅我當然唔去啦!

因為大風大雨, 我同仔仔囡囡只好留係屋企, 邊度都唔去得!

唔洗煮飯, 唔等於唔洗做!

整一大盆爆谷, 放套電影Brave勇敢傳說一齊睇, 我就只好一路睇一路盪衫(最憎盪衫)!

Brave勇敢傳說尼套電影, 幾好睇大人細路都啱, 故事內容好適合家庭.
(仔仔開始大個仔啦, 開始感受到無講出口嘅意思, 到結尾我睇到佢靜靜雞抺眼水! <我無出聲呀>)

Brave 好笑, 有家庭愛, 和結尾都好感人, 怕你哋未睇, 唔講咁多比你知!

晚餐啦! 有得食, 好野!




老公煮嘅奄列份量唔細架, 食完好飽飽!



個奄列落重料, 有好多芝士, 洋蔥, 紅椒, 西班牙火腿 (jamon serrano)!

好可惜, 你哋睇唔到一絲絲的芝士, 只有我先可以享受到啦!

Sunday 25 November 2012

懶人雞髀餐 (附做法)

唔得閒預備晚餐呀!

有咩食咩啦!

雞髀1盒4隻, 啱啱好, 蔬菜隨意, 有咩就用咩啦!

一盤過, 一次焗晒佢, 又懶又易, 唔洗點做, 啱晒!



雖然係懶人餐, 但係都好健康和完汁完味架!




用黑胡椒粉, 蒜粉, paprika, 旱辣椒粒, 自家製辣椒油少許, (小咪咪唔鐘意用大多鹽, 喜歡的話可以加D鹽) 醃雞髀

蔬菜有洋蔥, 紅蘿蔔,  紅薯, 薯仔, 西芹

把所有蔬菜加mixed香草拌匀, 加熱水

放雞髀在蔬菜上面, 用錫紙蓋面

入已預熱180-200度爐, 焗至雞髀和蔬菜熟 (唔好焗旱, 可以加水)

取去錫紙再焗至雞皮金黃




雞髀和蔬菜上碟, 把蔬菜雞汁去油, 把去咗油的汁加熱和少許調味, 慢慢加入生粉水至杰

把汁淋上雞髀和蔬菜上, 便成!




雞髀比較肥, 所以要去油, 去咗油的蔬菜雞汁非常之清甜, 一D都唔油利!

一盆過, 有肉有菜有汁, 真係懶到不得了! 

Wednesday 21 November 2012

越式春卷兩食

雖然小咪咪近排忙都頭都暈, 無時停, 但係點都要醫飽個肚!

見有盒米紙都未開, 就用佢啦!

整越式春卷至好不過!



簡簡單單, 有咩用咩, 才料有芽菜, 紅薯蔔絲, 蟹柳絲和蝦.

一整整多D, 同一款, 兩種食法和口味!




炸越式春卷 



米紙包越式春卷 

有汁點嚟一齊食架, 不過唔記得咗影相!

兩款食法家人都好滿意, 好快就食清光!

Sunday 18 November 2012

黑帶

~ 成功啦 ~

仔仔終於係台拳道黑帶高手啦!



尼條黑帶真係得來不易, 經過多年學習, 要考好多不同程度的帶, 最後才可以考黑帶!

昨日考帶, 真真正正考足一日, 由10am-6pm, 8個鐘不停打, 中間好少休息, 連午餐都係得10-15分鐘.




以上係黑帶高手啦!

真真正正的有血有汗嚟換條黑帶, 有幾個被打中鼻, D血到流得好勁, 有個隻眼已經黑晒!




全體考帶的日子, 啡帶(黑帶低一級), 有黑帶, 黑帶一段, 黑帶二段, 黑帶三段

佢哋嘅體力, 意志, 精神, 真係令人敬仰

Friday 16 November 2012

11月第二個生日

昨天係鄰居老人朋友生日, 係我哋今個月的第二個生日!

我哋年年都會為他做小型的生日party, 整個生日蛋糕比佢, 吹吓蠟蠋, 飲返兩杯, 又一晚!

今次整咗個士多啤利型蛋糕, 中間都有好多新鮮士多啤利架!






今年鄰居朋友76歲, 大個仔啦!

希望佢能保持身體健康啦!





囡囡好緊張個蛋糕呀!

囡囡問鄰居朋友: 食剩的蛋糕佢係唔係會帶晒返屋企呀?

鄰居朋友答: 你係唔係好鐘意食蛋糕呀?

囡囡話: 係呀, 我好鐘意食架! (隻眼仔不離個蛋糕)

鄰居朋友答: 好啦! 我唔帶晒返屋企, 留番比你啦!

囡囡當堂安樂晒! 月尾到囡囡生日佢自己都會有個蛋糕啦, 真為食!


Thursday 15 November 2012

日式鮮蝦香菇蒸蛋

昨晚同老公撐枱腳, 單單照燒三文魚好似悶咗些少!
而我又浸咗幾隻冬菇未用, 零機一觸, 蒸個日式蛋做配菜, perfect!


有蝦有冬菇, 令到個蒸蛋鮮味無窮


滑流流的日式鮮蝦香菇蒸蛋, 真係想食多幾碗呀!

日式照燒三文魚 (附食譜)

Tesco 做緊三文魚柳特價, 1英磅一件, 好抵呀!

當然立即買4件, 一人一件, 唔洗爭!

昨晚仔仔囡囡需要早D食晚飯, 煮咗三文魚配小麥比佢哋食咗先!

我同老公遲小小食可以撐吓枱腳!

小咪咪問老公: 想點食件三文魚呀? 

老公話: 是但啦, 配飯或麵都好啦!

佢無話薯仔喎, 即係唔想食西式啦, 咁小咪咪就整日式啦!




照燒汁才料: 豉油2tbsp, 糖2tbsp, 米酒1tbsp, 米醋1tbsp, 薑蓉少許, 蒜蓉少許

做法:

1. 把所有照燒汁才料混合, 醃三文魚一小時

2. 先煎三文魚肉再反轉煎皮, 煎至金黃和熟便成!






簡單又美味的日式晚餐, 可以係安安靜靜(仔仔囡囡已經訓咗覺)咁慢慢享受, 食得特別輕鬆!

而老公都對尼個晚餐非常滿意!

Monday 12 November 2012

又大一歲

小咪咪老公又大一歲啦!

今年老公生日咁啱係星期日, 可以一家大細出外一日, 真開心!

早上問老公想點慶祝, 佢話要去飲茶, 跟住可以去中式超市shopping喎!

哈哈! 依家老公真係好似半個香港人呀!




 老公生日又點可以無生日蛋糕啦!

11月有3個生日的日子, 唔想成個月都成住蛋糕, 所以整咗個百香果芝士蛋糕比老公做生日蛋糕! 芝士蛋糕, 都係蛋糕啫! 最緊要個主角鐘意!

仔仔囡囡當然要爭D心心朱古力啦!

下午飲完茶, 買完野 (我當然有大量入貨啦!),  一齊去公園行吓!





依家雖然凍, 但係四週環境的顏色好靚, D樹各有不同的顏色, 令到每個各落都好有美感!




尼個公園都幾大架, 唔單只有遊樂場, 散步徑, 仲有農場!

大大隻的動物至細細隻的兔仔, 雞仔!

最好之處係免費, 只係要比泊車費咋!

D細路可以係度玩半日, 都唔會悶!


依家尼邊好早就天黑, 所以探完, 摸完, 餵完D動物, 去遊樂場玩一陣, 再週圍行一陣, 又要返屋企啦!

返到屋企, 我哋一齊唱生日歌, 食生日芝士蛋糕!

一年一度, 又老多一年嘅日子, 又完咗啦!



Saturday 10 November 2012

芒果西米布丁 (附食譜)

吓! 近排食西米食上癮!

啱啱食完一大個椰汁西米糕, 又想再食西米!

上次整咗椰汁, 今次整芒果味, 仔仔囡囡又鐘意芒果味!

做布丁又可以帶返學做飯後甜品, 一舉兩得!





做法同芒果布丁做法相同, 只要加半碗已煮熟嘅西米拌匀, 雪凍便成!

芒果布丁做法按此






今次個布丁D色, 係唔係好正常呢! 

只係隻碟綠色咋!

米飯脆餅 (附食譜)

冷飯除咗用嚟炒飯之外, 用嚟整吓小食都唔錯架!

今次小咪咪用咗碗冷飯整咗脆餅, 香口又脆卜卜!



米飯脆餅做法:

1. 冷飯一碗加少許鹽, 雞粉, 五香粉和油, 拌匀
2. 用保鮮紙包起, 用手擠成團
3. 打開保鮮紙在飯團上放上另一張保鮮紙, 壓成薄片
3. 放入冰箱30分鐘
4. 切成小塊, 平底鑊加熱加少許油, 煎米飯片至金黃, 便成! 





仔仔囡囡見到D米飯脆餅脆卜卜, 食完一塊又一塊, 佢哋話好好味呀!

Thursday 8 November 2012

糯米包

小咪咪想食糯米, 但係又無雞又無排骨, 好似百無!

好在冰箱仲有已醃好的义燒, 燒咗舊义燒就有得食!

轉一轉款整糯米包, 不過唔係中式包包又唔係飲茶用雲吞皮包住嘅糯米包!



係小咪咪用糯米, 包成包型嘅包包!



餡料有义燒, 蠟腸, 蛋, 蔥粒, 芫茜



把餡料放在已煮熟的糯米飯中間, 包起成包型!



尼個糯米包煙煙 “un un” 加上餡料味濃, 令到個包包好惹味!

蝦心魚蛋

仔仔囡囡終於返返學啦!

小咪咪終於可以有返D私人空間啦! 人都精神D!

有返多D時間又可以係厨房攪吓小動咗!

講吓講吓晚飯時間又到!

小咪咪今次係魚蛋中間加咗粒蝦蝦, 粒魚蛋當堂升咗級!





蝦心魚蛋, 手快有手慢無呀!


外表平平無奇, 內裡好有心架!

家人對尼碟蝦心魚蛋好滿意呀!

Saturday 3 November 2012

南瓜批 (附食譜)

個南瓜咁大個, 整完湯, 仲可以整吓南瓜批!



才料: 甜牛油皮, 南瓜肉(大約)375g, 細沙糖(caster sugar) 70g, 蛋1隻, 橄欖油1tbsp, 鮮奶87ml,
香料 «鹽, 肉荳蔻(nutmeg), 肉桂粉(cinnamon), 薑粉(ground ginger)» 各少許 (個人口味加減)
做法:

1.預熱爐180度, 焗牛油皮加豆焗15分, 取去豆再焗15分鐘, 備用




2. 南瓜肉蒸熟, 壓做南瓜蓉, 待涼

3. 把其他才料混合, 加入南瓜蓉拌匀

4. 把南瓜料加入牛油皮

5. 入已預熱220度爐15分鐘, 轉180度再焗大約30分鐘

6. 待涼, 便成!


一個南瓜可以有幾種不同的食法, 今次南瓜批, 完成!

Friday 2 November 2012

南瓜湯

萬聖節完咗, 可以食南瓜啦!

一大個南瓜最好一次過整一大煲湯, 夠晒完汁完味!





仔仔幚手切南瓜粒, 囡囡幚手切洋蔥粒!

冰箱常有私房湯底存貨, 才料齊全, 南瓜湯話咁快就整好!

天氣凍凍地, 飲碗新鮮熱辣辣, 甜甜地嘅南瓜湯加上新鮮出爐的包包, 令全身暖粒粒!

Thursday 1 November 2012

整鬼扮怪萬聖節

一年一度的萬聖節又到啦!

係細路仔最開心的時刻, 個個都扮鬼扮馬!

而仔仔囡囡都好忙架, 要雕南瓜, 整蛋糕, 扮鬼怪, 四出敲門攞糖!

好好氣氛架!




仔仔囡囡年年都扮鬼怪同朋友仔一齊出動敲門攞糖(trick or treat), 而大人就隨後跟住, 睇住佢哋嘅瘋狂表演, 佢哋好開心架, 間間屋去敲吓門. 有D大人都好溶入氣氛, 扮鬼扮馬開門會嚇吓D小朋友先, 而有D屋都有好多不同的裝飾!




早上食完早餐就已經要開工啦! 尼個南瓜樣係仔仔囡囡的設計!




我幚手雕, 佢哋幚手切皮切肉, 就快有南瓜批食啦!



分工合作的製成品, 完成啦!



點上蠟燭, 大功告成!




小咪咪整咁多蛋糕, 尼個都真係最樣衰嘅一個!

仔仔囡囡整得佢越樣衰就越開心, 正正式式好樣衰嘅蛋糕呀!



攪咗一日, 終於等到天黑啦! 裝好晒身, 出得發 trick or treat!
今年唔好彩, 出門一陣就開始落雨, 仲越落越大! 對小朋友當然無影响啦, 不論風吹雨打, 只要有得玩, 全部都唔係問提, 不過有大人睇住, 今次trick or treat 都要提早玩完啦! 雖然提早返屋企, 都有玩咗成個鐘呀!



好緊張呀! 好緊張呀! 要驗查收獲呀!

但係尼個完全唔講道理嘅媽咪, 竟然要D又濕又凍嘅鬼怪, 沖咗涼先准驗查收獲!


係尼個特殊嘅情況吓, 兩隻鬼怪嘅行動超快, 比平時快咗起碼一倍, 好快就乾乾淨淨, 走返落嚟!




終於可以睇吓食邊樣先啦! 今次比住年宿短咗一半行程, 但係收獲都唔錯呀!