薯仔芝士波波 (附食譜)

薯條~成日都食, 薯角~好多時都會整嚟食! 變一變, 整薯仔芝士波波!

估唔到仔仔囡囡會瘋狂大食, 整咗一大碟, 一陣間又無晒, 好似好耐無比嘢佢哋食咁!

薯仔芝士波波好易整, 不過要花D心機和時間, 要一粒一粒咁整出嚟!

才料: 薯仔, 芝士, 雞蛋, 麵包糠

做法: 1. 薯仔去皮, 切粒, 加水煮至熟

2. 瀝水, 壓成薯蓉, 加芝士, 混合, 待涼

3. 每次小量薯蓉, 輕輕手滾成球型

4. 沾上雞蛋汁, 再沾上麵包糠

5. 炸至金黃, 完成!

忍到口就等無咁熱先食!

忍唔到口就小心熱呀!

香脆曲奇 (附食譜, 普通和懶人做法)

好耐無整餅或曲奇, 心血來潮又手癢癢, 就去整D曲奇啦!

時間啱啱好, 仔仔囡囡放學返嚟就有得食!

才料:

牛油175g, 糖粉230g, 蛋2隻, 麵粉300g, 雲尼拿精數滴

普通做法:

1. 牛油和糖粉打至淡色, 蓬鬆
2. 把蛋加入(1)拌匀
3. 把麵粉, 雲尼拿精加入(2), 拌匀
4. 唧出自己喜歡的形狀
5. 入已預熱180度的爐, 焗大約10-15分鐘
6. 取出放在架上待涼, 便成!

懶人做法:

同普通做法一樣, 但用食物攪拌機做步驟 (1-3)步驟3, 拌匀便可

小咪咪當然係用懶人做法啦! 慳時間, 慳手力, D糖粉又唔會飛到週圍都係!

今次唧花花, 一啖一粒!

為食仔仔囡囡放學返嚟見到D曲奇發晒狂, 我要限量比佢哋食呀!

   　

蛋糕籌款

仔仔學校, 用賣蛋糕為六年級結業日籌款.

六年級的家長整蛋糕之餘, 學生就比賽吓, 睇吓邊班賣得最多!

小咪咪昨晚同仔仔蛋糕扮靚, 出一分力啦!

整吓整吓, 整咗成30枝波棒蛋糕

我仲好小心同佢地全部獨立包裝架!

終於大功告成! 可以去瞓覺啦!

仔仔今日放學返嚟話我知, 我哋D波棒蛋糕10分鐘內就賣晒!

仔仔好開心呀! 希望仔仔個班會贏啦!

粟米芝士司康餅 (附食譜) Sweetcorn and Cheese Scones

小咪咪已經將所有粟米, 摘晒落嚟, 有兩大袋呀!

用得就用, 雪得就雪, 靜係處理D粟米都已經攪咗成個鐘, 只係清咗一袋咋, 仲有排攪呀!

見D粟米咁新鮮, 當然要整D新鮮出爐就食得嘅小食啦!

所以今次整咗鹽味嘅司康餅 ~ 粟米芝士司康餅 ~

非常之易整, 又快捷, 好快有得食!

才料: 粟米兩條 (切粒), 自發粉350g, 泡打粉1tsp, paprika 1/4tsp, thyme 少許, 牛油粒50g, 芝士100g, 鮮奶175ml

做法:

1. 煮粟米粒, 滴水, 備用
2. 把自發粉, 泡打粉, paprika, thyme 拌匀, 加入牛油粒, 揉成麵包糠狀
3. 加入芝士, 粟米和鮮奶, 拌匀
4. 把枱面灑上少許麵粉, 搓麵團至混合
5. 把牛油紙放在焗盆上, 灑上麵粉.
6. 麵團分成小球, 放在焗盆上, 掃上少許鮮奶, 放入已預熱200度的爐, 大約12-15分鐘, 便成!

~ 粟米芝士司康餅 ~ 帶有甜甜的粟米味, 香濃的芝士味, 非常之moist!

司康餅唔一家係甜, 鹽味都一樣係很美味的司康餅!

病了 + 波棒蛋糕(附做法)

平時好少病的小咪咪, 終於倫到我病咗啦!  大傷風, 個鼻好痛呀! 頭又重, 眼又重, 一時又凍又熱! 仲不停咁包雲吞! 真係唔好玩!

慣咗照顧家人的我, 依家倒返轉由家人照顧! 真係唔多習慣!

突然間覺得仔仔囡囡大個咗好多, 佢哋不停地問住我覺得點! 今朝早, 仔仔整咗早餐, 帶到床上比我食, 仲有整一份比妹妹食添, 仲帶囡囡返學, 放學(佢哋讀同一間學校), 等我唔洗出出入入喎!  真係大個仔囉!

老公就不停地整檸檬蜜糖水比我飲.  我每次唔舒服, 老公都會整檸檬蜜糖水比我飲, 等我快D吸收多D維他命C, 快D好返.
家人的愛護, 真令我感動!

休息咗一日, 有返D精神, 見早幾日整咗~波棒蛋糕(cake pop)~ 都未寫, 依家就寫出嚟啦!

唔係波棒糖嚟架! 係波棒糖型的蛋糕, 一支支蛋糕, 好可愛架!

做法簡易, 把蛋糕漿放入這個圓型蛋糕模內

蓋上蓋, 焗大約12分鐘

(應該一個個圓形架, 今次落多咗蛋糕漿, 要收邊) 取出待涼, 入冰箱30分鐘

我今次用白朱古力, 溶朱古力, 棒頂沾少少朱古力, 刺入蛋糕成波棒糖型

把波棒蛋糕沾上朱古力和裝飾, 待乾, 便成!

外型似波棒糖, 但係入面係軟綿綿的蛋糕, 外面薄薄的朱古力唔係好甜, 配上自己喜歡的裝飾, 支支唔同款, 夠晒特別! 同小朋友一齊整更加開心! 

寫完尼個post, 對眼仔又重重哋, 又要包雲吞, 我諗我都係時侯休息啦!

心心朱古力米通餅 (附食譜)

放暑假, 嘆咗6個星期! 9月開學, 又要再開始過忙忙碌碌的日子!

仔仔囡囡開學, 小咪咪又要再開始返工!

小咪咪唔係返工, 就要打理頭家細務, 或者落田處理蔬菜種植, 一日忙到黑!

雖然忙, 但係也樂在其中!

就係因為小咪咪咩都要做吓, 攪吓, 玩吓, 渡至小食部的食品數量開始下降!

為免接受投訴, 要整D免煮特快小食.

見到D心心, 心都甜晒, 無投訴!

才料: 黑朱古力, 白朱古力, 米通

做法: 1. 用微波爐溶朱古力, 加入米通, 拌匀!

2. 把白朱古力米通放入盆壓實

3. 加上黑朱古力米通壓實

4. 放入雪櫃大約15分鐘雪硬, 便成!

小貼士: 可以用什何型狀的盆. 如果唔用盆, 用蛋糕仔的紙杯也可, 但係不要壓實!

蘋果朱古力燕麥烙餅 Apple Chocolate Flapjack

仲係暑假期間, 當然要整多D小食啦! 因為這兩個星期一見唔落雨就出外玩和野餐, 唔想次次野餐都一樣, 所以次次都整D唔同的小食!

尼兩個月都叫做夏天, 無人食麥皮, 雖然有排都未過期, 但係見仲有一包都未開, 好想消滅咗佢!

所以就整咗蘋果朱古力燕麥烙餅 (Apple Chocolate Flapjack)

在英國, 燕麥烙餅(Flapjack) 係好普遍的小食, 但因為燕麥烙餅(Flapjack)的成份係有好多牛油和糖, 所以大人間唔中食少少好啦, 活躍的小朋友食多少少都唔怕, 小朋友跳兩跳就咩肥都跳走晒啦!

才料: 牛油250g, 糖250g, 糖漿175g, 燕麥425g, 蘋果粒2個, 朱古力粒2tbsp

做法:

1. 把牛油, 糖, 糖漿煮溶, 離火加入蘋果粒, 朱古力粒拌匀

2. 放入焗盆, 入已預熱180度的爐, 焗大約20-25分鐘
3. 待完全涼後, 取出盆, 切件, 便成!　

椰絲糖 Coconut Ice (附食譜)

這是一款不用煮和不用焗, 而又充滿椰香的糖!

只需四種才料, 便可以整到椰絲糖!

上次整黑白芝士蛋糕開咗罐煉奶, 仲有好多剩, 所以用嚟整吓椰絲糖!

才料: 煉奶200g, 糖粉225g, 椰絲175g, 少許粉紅色食用色素

做法:

1. 把煉奶和糖粉拌匀, 加入椰絲拌匀
2. 把(1)分開一半, 用一半加入色素, 拌匀
3. 用牛油紙佈在盆內, 放入白色椰絲糖, 壓平, 再加上粉紅色椰絲糖, 壓平
4. 放入雪櫃大約3小時, 硬後便可以切粒, 便成.

小提示 ~ 如想整啡色, 可以加溶朱古力.  香港天氣熱, 切粒後, 放入盒最好儲存在雪櫃 ~

親子餅乾

仔仔囡囡細細個已經好鐘意係厨房攪攪震!

放暑假節目之一, 當然係煮吓, 焗吓! 

仔仔囡囡開始大個D啦! 可以自己整D簡單的食物!

今次由仔仔囡囡一手一腳整餅乾, 一整就整咗兩種餅!

而我就負責清理現場, 任務仲大!

第一款係普通餅乾, 印吓字母, 都已經好開心!

味道唔錯呀! 佢哋有跟足食譜份量嫁!

第二款係 Chocolate Kiss, 餅就朱古力味, filling 就薄菏味和橙味!

整filling 的時候, 見佢哋攪到手仔軟, 但係都唔放氣, 都唔比人幚, 最後兩個都自己攪掂!

個 Chocolate Kiss, 仔仔整橙味, 囡囡整薄菏味! 都整得似模似樣呀!

一個下午好快就過咗啦! 不過就無人想食晚餐!

蒜蓉芝士波波(附食譜)

蒜蓉芝士波波出場啦!

在上一個post吞拿魚焗意粉+蒜蓉芝士波波, Blog友們對這個蒜蓉芝士波波好有興趣, 依家post出食譜與大家分享!

這個是小咪咪攪攪震食譜, 一小時內, 這個蒜蓉芝士波波就可以上枱.  快手的話30分鐘就有得食!


才料:
(A) 高筋麵粉250g, 暖水180ml, 鹽1/2tsp, 依士1.5tsp, 橄欖油2tbsp
(B) 芝士16粒 (我用 Cheddar Cheese)
(C) 牛油15g(溶化), 蒜蓉, parsley碎(芫荽香草)1tbsp, chili flake(辣椒乾片)少許, 鹽少許

做法:

1. 把(A)除橄欖油外, 全部混合成麵團, 加橄欖油
2. 搓10分鐘至光滑
3. 切分成16份, 揉圓, 輕手壓扁, 放入芝士粒, 收口,揉圓
4. 入已預熱180度烘爐大約15-20分鐘
5. 把(C)混合, 待用

6. 芝士波波出爐, 放上碟, 淋上(5)

完成!

蒜蓉芝士波波不用等發酵, 因為體積小, 在焗的時候同一時間發酵, 非常方便!

才料(C)的份量, 可以隨自己口味加多減少

非常鬆軟!

千層酥(核桃, 杏仁, 朱古力＆肉桂粉)

6月又返回冬天的天氣, 昨天落雨落足一日. 留係屋企看吓電映又一日﹒

今日有D太陽, 全家出外行吓! 人都醒晨D!

野餐做午餐，真開心！立即做Ｄ小食，非常容易做和小朋友都做得！

個杏仁千層酥係仔仔做架！

才料簡單，做法容易！

才料：（糊：蛋白２０ｇ，糖粉９０ｇ）酥皮，核桃, 杏仁, 朱古力粉＆肉桂粉

做法：１。把糊才料混合　２。酥片壓成長方形　３。掃上糊



４。分別加上枯仁片，核桃碎，朱古力＆肉桂粉

５。放上保鮮紙，輕壓面，切件

６。取走保鮮紙

７。放入已預熱２００度的烘爐，大約１５分鐘（至酥皮熟）

８。放在架上，待涼，便成！

原本無做朱古力肉桂粉千層酥，但係仲有Ｄ頭頭尾尾的酥皮剩。

點知最受歡迎都係就係佢！