日式咖哩

忙忙碌碌的小咪咪, 要整D又快又好味的晚餐呀!

有碗肉片係雪櫃, 蔬菜應有盡有!

樣樣野加加埋埋就有一大煲日式咖哩!

天氣凍凍地, 食D咖哩暖暖地!

家人見到碗咖哩好開心, 有肉片, 薯仔, 紅蘿蔔, 蘿蔔, 蘑菇, 西芹, 洋蔥!

有飯, 有烏冬, 配日式咖哩, 食到肚仔飽飽, 暖粒粒! 

心心焗盆

明天行街街比我見到個大形心心膠焗盆!

好抵呀 £2.49英磅咋! 唔洗諗啦, 立即帶心心返屋企!

仲有幾種顏色選擇, 籃色, 綠色,紫色.  小咪咪緊係要紫色啦!

一個靚靚又抵買嘅心心焗盆就已經令小咪咪好開心啦!

囡囡放學見到個盆, 佢話要整蛋糕!

囡囡就攪呀, 攪呀, 整咗個朱古力蛋糕做飯後甜品!

由囡囡整的心心朱古力蛋糕!

粟米芝士司康餅 (附食譜) Sweetcorn and Cheese Scones

小咪咪已經將所有粟米, 摘晒落嚟, 有兩大袋呀!

用得就用, 雪得就雪, 靜係處理D粟米都已經攪咗成個鐘, 只係清咗一袋咋, 仲有排攪呀!

見D粟米咁新鮮, 當然要整D新鮮出爐就食得嘅小食啦!

所以今次整咗鹽味嘅司康餅 ~ 粟米芝士司康餅 ~

非常之易整, 又快捷, 好快有得食!

才料: 粟米兩條 (切粒), 自發粉350g, 泡打粉1tsp, paprika 1/4tsp, thyme 少許, 牛油粒50g, 芝士100g, 鮮奶175ml

做法:

1. 煮粟米粒, 滴水, 備用
2. 把自發粉, 泡打粉, paprika, thyme 拌匀, 加入牛油粒, 揉成麵包糠狀
3. 加入芝士, 粟米和鮮奶, 拌匀
4. 把枱面灑上少許麵粉, 搓麵團至混合
5. 把牛油紙放在焗盆上, 灑上麵粉.
6. 麵團分成小球, 放在焗盆上, 掃上少許鮮奶, 放入已預熱200度的爐, 大約12-15分鐘, 便成!

~ 粟米芝士司康餅 ~ 帶有甜甜的粟米味, 香濃的芝士味, 非常之moist!

司康餅唔一家係甜, 鹽味都一樣係很美味的司康餅!

蘿蔔絲餅 (附做法)

摘咗幾個蘿蔔都未用, 要快D用咗佢先得啦!

蘿蔔絲餅, 清清地, 甜甜地. 我仔仔囡囡好鐘意架!
整嚟比佢哋做放學後小食, 開心到飛起!

今次只附做法, 因為小咪咪又用咗對眼做量器! 有咁多大厨, 唔洗食譜都識整啦!
 

麵團: 中筋麵粉, 熱水

餡才料: 蘿蔔絲, 紅蘿蔔絲, 蔥段

調味: 雞粉, 胡椒粉, 鹽 各少許

做法: 1. 麵粉加熱水搓成麵團, 用保鮮紙包好, 待15-30分鐘

2. 把所有餡才料炒軟, 加入調味炒熟, 待涼

3. 壓平適量的麵團, 放入餡料

4. 收口, 收口向下, 灑少許粉防黏

5. 用中慢火, 煎麵團熟至金黃, 便成!

雪耳紅棗糖水

愛美係女人的天性! (我唔做黃面婆架)

天氣轉, 女仕們當然要留意吓D皮膚啦!

湯水的滋潤, 再加上糖水的潤膚! 女仕們無論咩天時, 都會係咁靚靚!

飲碗紅棗雪耳糖水, 真係令你(我)樣靚聲甜呀! (我真係唔知羞囉!)

紅棗~養血, 養顏. 雪耳~滋陰!

要靚靚就快D煲嚟飲吓啦!

蘑菇釀奶油瓜(附食譜) Stuffed Butternut Squash+ 蘑菇白汁Gnocchi

奶油瓜帶有甜味, 瓜質柔軟!

依家食瓜又平又靚, 一大個奶油瓜只係89p, 好抵食呀!

本來想用嚟整咖哩, 但見前晚已經食咗飯, 無晒飯癮, 轉一轉口味, 釀咗個瓜佢, 又一餐!

睇吓個雪櫃, 仲有蘑菇, 忌廉未用.  一於用蘑菇釀奶油瓜!

才料: 奶油瓜, 蘑菇(切片), 紅洋蔥(切粒), 忌廉, 黑胡椒粉, 芝士

做法: 1. 把瓜切開一半, 去籽, 去絲

2. 界瓜肉, 灑上少許鹽, 放入已預熱180度的爐30分鐘

3. 在瓜焗好5分鐘前煮蘑菇釀料, 煮軟洋蔥加蘑菇至熟

4. 加入忌廉, 煮滾後, 熄火, 加入芝士, 拌至混合

5. 取出瓜, 佈上蘑菇釀料, 加上芝士, 再回焗爐30分鐘至金黃

焗好的蘑菇芝士奶油瓜, 好creamy, 一個瓜啱啱好, 一人一件, 夠晒一家四口!
另外再煮個蘑菇香汁嚟配Gnocchi, 真係非常之好配搭呀!

粟米紅蘿蔔瘦肉湯

天氣仍然乾燥, 所以近排會煲多D湯水!

現時係粟米收成的時候, 粟米又肥又甜又大!
粟米紅蘿蔔瘦肉湯 ~ 粟米清熱利尿, 紅蘿蔔含胡蘿蔔素和維他命A, 瘦肉含蛋白質, 適合全家飲用!

這煲湯的粟米, 紅蘿蔔都係自種的蔬菜, 所以更加鮮甜!