遲到!

今年天氣差, 所有的植物都成熟得遲. 

但係遲到好過無到, 陸陸續續有收成!

小咪咪食紅草莓, 食咗幾個月啦! 這批是秋季紅草莓!

蕃茄日日都有!

花花 sweet peas 遲到!

四季豆 ~ 唔好以貌取豆呀, 唔好見佢黑色, 就覺得佢樣衰呀!

煮熟咗會變返緣色, 好靚仔, 好爽架!

開始凍啦! 搬晒D魚翅瓜返屋企!

粟米遲晒大到!

見粟米雖然遲咗好多, 但係有到, 已經好令我好開心!

蕃茄湯+罌粟子包(poppy seed bread)+迷你炸魚

仍然有好多蕃茄好新鮮, 一次過用多D整咗一大煲西式的蕃茄湯!

有湯當然要有包包啦, 整咗一大個罌粟子包, 一齊分享!

係Morrisons見有魚仔(sprat)賣, 仔仔見到一定好開心, 所以買嚟炸比仔仔食啦!

蕃茄日日都有幾個轉紅, 要食快D先得啦!

用咗好多新鮮蕃茄煮成的蕃茄湯

一個又大又暖粒粒的包包

用包包沾滿湯一齊食, 老公食到咀不停

魚仔(sprat)細細條, 好新鮮, 非常之抵食

英式迷你炸魚, 一啖一條, 仔仔開心到暈!

中西豉油雞飯 (附做法)

中西合壁的豉油雞好惹味, 配上芫茜蔥飯帶出更多香味!

今次只提供做法, 因為小咪咪慣咗手世, 用咗對眼做量器囉!

用入焗爐的焗盆嚟醃雞件(個盆要夠深)

用豉油, 蜜糖, 薑蓉, 蒜蓉,  , 樣樣醃料都要多, 越多薑蓉, 蒜蓉, 就越香!

所有才料混合好後, 雞皮向下, 用錫紙包好, 醃至少3小時, 最好過夜!

入已預熱210度的爐, 焗大約30分鐘, 30分鐘後取走錫紙, 反轉雞件, 雞皮向上, 爐改溫180度, 入爐再焗大約30分鐘, 便成!

雞件味濃, 肉嫩! 配上清香的芫茜蔥飯, 簡單的蔬菜, 再淋上少許的雞汁!

這個中西合壁的豉油雞飯, 又係另一種風味啊!

黑椒豬肉乾

囡囡落咗order, 要食豬肉乾!

冰箱仲有舊細豬肉, 就用佢嚟整啦!

加咗好多黑胡椒, 香口好多又辣辣地, 啱哂我們口味!

放學後有D朋友仔來玩, 囡囡見到D豬肉乾開心到飛起, 連其他小朋友都好鐘意呀!

小朋友玩夠回家後, D豬肉乾所剩無幾!

睇嚟又要再整多批啦!

蘋果金寶 (Apple Crumble) (附食譜)

依家係蘋果成熟的時間, 小咪咪都開始有收成啦!

一定唔少得蘋果金寶!

這幾個蘋果唔係青蘋果呀, 係煮食用的蘋果 (cooking apple)

啱啱係棵樹摘落嚟, 夠晒新鮮呀!

木糠 - 用7oz麵粉+5oz牛油+1tbsp黃糖+1tsp ground nutmeg 鏈成似麵包糠

蘋果切件+肉桂粉+糖粒demerara sugar(普通糖也可) (大約3tbsp, 個人口味加減糖份) - 拌匀, 放在盆底

木糠放在蘋果上

入已預熱200度的爐, 焗大約45分鐘, 便成!

配上雪糕, 忌廉 或 custard, 便成為一個完美的甜品!

火雞肉丸燴鮮茄意粉 (附食譜)

自製肉丸衛生又健康, 家人好鐘意架!

仍然有好多蕃茄收成, 今次用嚟整意粉汁啦!

整肉丸平靚正, 又係一餐經纃餐, 又可以打斧頭啦! 

肉丸才料: 免治火雞肉, 紅蘿蔔粒, 麵包糠, 鬼佬芫茜-切碎(parsley), (油, 鹽, 糖 各少許)



做法:

1. 把所有材料混合, 待30分鐘


2. 平底鑊加熱下油, 取少許火雞料搓成球形, 沾上麵粉, 放入鑊煎至外面金黃, 備用

鮮茄汁才料: 洋蔥-切條, 蒜蓉, 大量蕃茄-切件

調味: 茄汁, 糖, 喼汁, 混合香草, 黑胡椒粉, 羅勒葉 (basil)-切碎

做法:

1. 洋蔥熟軟, 加蒜蓉, 加蕃茄熟軟, 加熱水
2. 加入調味 (除羅勒葉外)
3. 轉慢火煮20-30分鐘
4. 放入肉丸慢火再煮15-20分鐘
5. 最後加上羅勒葉, 便成

煮意粉時, 可加些自己喜歡的蔬菜一起煮, 慳時間, 唔洗分開煮

小咪咪加咗肉豆( runner beans)




意粉煮好後, 加入肉丸鮮茄醬, 拌匀, 便可上碟, (灑加上芝士粉上面, 便加美味)

一品鍋

有件魚翅瓜, 仲有好多玉豆, 切好晒, 但係唔知點煮好.

用上湯煮咗D瓜先, 好甜, 好多湯! 於是就去冰箱睇吓有D咩!

有袋自製魚蛋, 蝦, 蟹柳.  加加埋埋就整咗個一品鍋!

煮咗一大煲, 仔仔囡囡食到耳仔郁!

味道十分鮮甜又易入口! 咩都加D的一品鍋 ~家人鐘意到暈 ~